Þegar félagsmaður þarf að ferðast meira en 50 km til þess að komast frá heimili til fræðslustofnunar getur hann sótt um ferðastyrk. Skila þarf sér umsókn um ferðastyrk sem ávallt skal tengjast námi/námskeiði/ráðstefnu sem félagsmaðurinn sækir. Greiði félagsmaður ekki sjálfur fyrir nám/námskeið/ráðstefnu þarf að skila inn staðfestingu á þátttöku með umsókn um ferðastyrk.
Með umsókn skal fylgja:
- Reikningur sem er á nafni félagsmanns þar sem fram kemur kostnaður vegna ferðalags.
- Staðfesting á greiðslu, t.d. skjámynd úr heimabanka eða greiðslukvittun.
- Skilyrði fyrir styrkveitingu er að félagsmaður greiði ferðakostnað.
- Reikningur má ekki vera eldri en 12 mánaða.
- Ekki er hægt að sækja um styrk oftar en einu sinni vegna sama reiknings.
Þegar um skipulagðar fræðsluferðir er að ræða þá eru skilyrði fyrir veitingu ferðastyrks að félagsmaður greiði ferðakostnað í tengslum við starfstengt nám, námskeið, starfstengda heimsókn til fyrirtækja eða ráðstefnu og skili inn staðfestingu á þátttöku þegar þátttökugjald er ekki innheimt. Dagskrá verður að fylgja umsóknum vegna starfstengdra heimsókna í fyrirtæki og ráðstefna. Í dagskrá vegna starfstengdra heimsókna í fyrirtæki verður að koma fram hvaða staðir eru heimsóttir, hvert efni kynningar er á hverjum stað og tímasetningar. Einnig þar að skila inn staðfestingu á þátttöku í formi áritaðs bréfs frá yfirmanni eða umsjónarmanni ferðarinnar. Í bréfinu skal ferðinni lýst og tilgangur hennar útskýrður.
Hámarksferðastyrkur er 30.000 kr. á ári en að hámarki 50% af reikningi. Farið er eftir kílómetragjaldi Fjármála- og efnahagsráðuneytis ríkisins í hvert sinn.