Samþykktir Starfsmenntasjóðs
verslunar- og skrifstofufólks
1. gr.
Nafn sjóðsins og heimili
1.1. Sjóðurinn heitir Starfsmenntasjóður verslunar- og skrifstofufólks. Skammstöfun sjóðsins er SVS.
1.2. Sjóðurinn er stofnaður á grundvelli kjarasamnings á milli Samtaka atvinnulífsins (SA) annars vegar og VR og Landssambands íslenzkra verzlunarmanna (LÍV) hins vegar dags. 14. maí 2000.
1.3. Sjóðurinn er eign VR, LÍV og SA. Heimili og varnarþing er í Reykjavík.
2. gr.
Markmið sjóðsins
2.1. Markmið sjóðsins er að auka hæfni og menntun verslunar- og skrifstofufólks, ásamt því að stuðla að auknu framboði af námi og námsefni sem svari þörfum atvinnulífsins á hverjum tíma.
3. gr.
Verkefni sjóðsins
3.1. Verkefni sjóðsins eru að veita styrki til:
a) menntunar félagsmanna
b) námskeiðahalds
c) námsefnisgerðar
d) fyrirtækja til starfs- og endurmenntunar félagsmanna
4. gr.
Tekjur sjóðsins
4.1. Atvinnurekendur skulu greiða sem svarar 0,30% af heildarlaunum félagsmanna í sjóðinn.
4.2. Atvinnurekendur geta sótt um undanþágu frá fullu iðgjaldi að uppfylltum skilyrðum, sbr. 12. grein. Iðgjald til sjóðsins lækkar þá í 0,10% af heildarlaunum félagsmanna.
4.3. Stéttarfélögin skulu greiða mótframlag sem svarar einum fjórða af greiddu framlagi atvinnurekenda og skal uppgjör fara fram einu sinni í mánuði eða eftir samkomulagi samkvæmt samningi.
4.4. Vaxtatekjur af iðgjöldum og fjárfestingum.
5. gr.
Stjórn sjóðsins
5.1. Stjórn sjóðsins er skipuð sex mönnum til tveggja ára í senn; VR tilnefnir tvo fulltrúa, LÍV tilnefnir einn fulltrúa og SA tilnefnir þrjá fulltrúa. Varamenn skulu vera fjórir; tveir tilnefndir af VR og LÍV og tveir af SA.
5.2. Stjórnin kýs formann, varaformann og ritara. Aðilar sjóðsins skulu skiptast á að gegna formennsku til tveggja ára í senn.
5.3. Stjórn sjóðsins ber ábyrgð á innheimtu, úthlutun styrkja og öðrum fjárreiðum sjóðsins.
5.4. Sjóðurinn greiðir allan kostnað sem af starfsemi hans leiðir.
5.5. Ekki skal greitt sérstaklega fyrir stjórnarsetu. Ferðakostnaður stjórnarmanna að lágmarki 50 km frá Reykjavík er greiddur.
5.6. Stjórn sjóðsins er heimilt að fela aðila umsjón með daglegum rekstri sjóðsins, s.s. innheimtu og skilum iðgjalda, greiðslu styrkja, móttöku umsókna, fjármálum o.s.frv. Slíkir samningar skulu vera skriflegir. Ávöxtun sjóðsins skal vera í samræmi við 7. gr.
5.7. Stjórnin setur nánari starfsreglur um greiðslu og fjárhæð styrkja, ávinnslu réttinda og aðra starfstilhögun.
6. gr.
Reikningar og endurskoðun
6.1. Reikningar sjóðsins skulu lagðir fram áritaðir af löggiltum endurskoðanda fyrir 1. maí ár hvert. Reikningar skulu sendir til stofnaðila. Reikningsár sjóðsins er frá 1. janúar til 31. desember.
7. gr.
Ávöxtun sjóðsins
7.1. Heimilt er að ávaxta fé sjóðsins með eftirfarandi hætti:
a) Í ríkisskuldabréfum, í skuldabréfum sem tryggð eru með ábyrgð ríkissjóðs
b) með kaupum á markaðsskráðum verðbréfum
c) Í bönkum eða sparisjóðum
d) Í fasteignum tengdum starfsemi og markmiðum sjóðsins
e) Á annan þann hátt er stjórn sjóðsins metur tryggan
8. gr.
Ávinnsla réttinda
8.1. Félagsmaður ávinnur sér rétt með því að atvinnurekandi greiði iðgjöld til sjóðsins. Atvinnurekandi sem jafnframt er launþegi þarf að vera í iðgjaldaskilum svo að réttindi ávinnist. Ávinnsla rétttinda er nánar tilgreind í 5. gr. starfsreglna sjóðsins.
9. gr.
Skilyrði greiðslu styrkja til félagsmanna
9.1. Rétt til styrkveitinga úr sjóðnum eiga þeir sem eru félagsmenn í VR/LÍV
9.2. Styrkir eru afgreiddir við framvísun umsóknar og greiðslukvittunar.
10. gr.
Styrkir til aðildarfyrirtækja
10.1. Fyrirtæki sem greiða iðgjald til sjóðsins og eru í skilum eiga kost á styrkjum til verkefna sem hafa það að markmiði að mennta starfsfólk fyrirtækisins. Styrkhæf verkefni geta m.a. verið námsefnisgerð eða námskeiðahald.
10.2. Stjórn sjóðsins tekur ákvörðun um styrkveitingar og upphæð styrkja í hverju tilviki fyrir sig. Sjá nánar í starfsreglum.
11. gr.
Aðrir styrkir
11.1. Stjórn er heimilt að veita styrki til einstaklinga, fyrirtækja, félagasamtaka og skóla, s.s. vegna útgáfu námsefnis, kennslu eða annars sem að mati stjórnar leiðir til aukinnar menntunar félagsmanna.
12. gr.
Lækkun iðgjalds
12.1. Skilyrði fyrir lækkun er að:
a) Virk endurmenntunarstefna sé í fyrirtækinu.
b) Allir starfsmenn sem greitt er af til VR/LÍV eigi kost á að sækja bæði fag- og almenn námskeið sem eru í boði.
c) Atvinnurekandi sýni fram á að kostnaður vegna menntastefnu sé hærri en sem nemur 0,30% af heildarlaunum félagsmanna.
12.2. Stjórn sjóðsins metur hvort skilyrðum 12.1. sé fullnægt og er það mat endanlegt. Staðfesti stjórn undanþágu um lækkun iðgjalds úr 0,30% í 0,10% gildir undanþágan til eins árs fyrsta árið og eftir það til tveggja ára í senn.
13. gr.
Breytingar og endurskoðun á reglugerð
13.1. Breyting á reglugerð sjóðsins skulu staðfestar af öllum stofnaðilum sjóðsins.
Breytingar í apríl 2008, 1. janúar 2014 og 1. janúar 2015